Şerê ku bi êrîşên DYE û Îsraîlê di 28’ê Sibatê de dest pê kir, ketiye roja xwe ya heftemîn. Li ser bersivdana Îranê şer bandor li erdnîgariyeke berfireh bû. Bi şev teqînên dijwar bi taybetî li Tehran û Beyrûdê, çêbûn.

Serokê DYE’yê Donald Trump ji NBC News’ê re axivî û got ku operasyoneke bejayî li dijî Îranê dê "windakirina demê" be û îdia kir ku Îranê berê windahiyên giran daye.

Wezîrê Karûbarên Derve yê Îranê Abbas Arakçî, jî diyar kir ku operasyoneke bejayî ya DYE’yê dê bi karesateke mezin bi dawî bibe û got ku Îran ji bo her senaryoyekê amade ye.

Artêşa Îsraîlê, ragihand ku wan 26 êrîşên hewayî li başûrê Beyrûdê kirine, ku navendên fermandariyê û depoyên dronan ên Hizbullahê hedef girtine. Gelek teqîn li rojhilat û rojavayê Tehranê jî hatine ragihandin.

Rageşiyê li seranserê herêmê belav bûn. Hizbûllahê daxwaza valakirina wargehên nêzîkî sînorên Îsraîlê kir. Li Behrêynê ji ber êrîşên Îranê hin avahiyan zirar dîtin. DYE’yê, ragihand ku di operasyonên bi Îsraîlê re hatine kirin de, zêdetirî 30 keştiyên Îranî hatine binavkirin.

Erebistana Siûdî û Qeterê, ragihandin ku wan rê li ber êrîşên mûşekî û dronan ên ku baregehên DYE’yê hedef digirin, girtine. Di vê navberê de, serhildêrên Hûsî yên li Yemenê, ragihandin ku ew amade ne ku êrîş bikin.

Serokkomarê Fransayê Emmanuel Macron, ragihand ku Fransa dê beşdarî pevçûnê nebe.